13 јуни, 2025 г.
Пред два дена во рамки на активностите кои се дел од промоцијата и развојот на мрежата на хортикултурните библиотеки во државата и пошироко во регионот НУ Библиотека „Григор Прличев“ од Охрид го реализира проeктот од годишната програма за работа “ Цветна библиотека – хортикултурна библиотека“.
Регионалната средба и работилница на библиотекари од Охрид, Струга, Ресен, Битола, Кичево и Демир Хисар беше можност за размена на библиотечни практики и успешни приказни поврзани со хортикултурните содржини во установите.
Директорката на библиотеката, Христина Трпеска во своето поздравно обраќање кон учесниците и предавачите ја истакна важноста на иновациите во библиотечното работење, споделувањето на искуства од страна на библиотекарите и нивната меѓусебна соработка, со акцентот на развивање и деловни партнерски односи со локалната средина, каде граѓаните и локалната самоуправа можат да придонесат за подигнување на квалитетот на библиотечното работење, не само во градот туку и во целата држава.
Истакнувајќи ја местоположбата и значењето на градот Охрид во однос на неговото историско и културно минато, директорката се задржа на активностите поврзани со промоција на овие содржини преку соодветни библиотечни програми.
„Библиотеката се ребрендира во овој период, што понатаму ќе придонесе за нејзиниот попривлечен изглед преку рекламен материјал, банери, печатење на маици, капи, торби за книги, тоа ќе резултира со поголема препознатливост во средината, “рече Трпеска.
Соработката со Паркови и зеленило при ЈП „Охридски комуналец“ ќе допринесе за развој на програмите кои кореспондираат со УНЕСКО Агендата 2030 за одржлив развој, каде токму библиотеките претставуваат клучен фактор.
Координаторот на проектот м-р Милчо Јовановски, виш библиотекар во своето излагање и претставување на проектот ги истакна напорите на нивната библиотека за добивање на дополнителен простор надвор од зградата и неговото уредување за потребите за реализација на библиотечните програми со хортикултурни содржини.
„ Сакаме да сме библиотека, активен посредник во изградба на современото и еколошко живеење, овозможувајќи го побрзиот пристап до активностите со хортикултурна димензија, по примери кои ги реализиравме со помош на координаторот на регионалната мрежа на хортикултурни библиотеки м-р Јелена Петровска“, истакна Јованоски.
На средбата беше заклучено дека од големо значење за библиотеките кои сакаат да го следат светскиот тренд на хортикултура е набавката на соодветна стручна литература која што ќе биде целосно во функција на барањата на граѓаните во однос на квалитетното користење на слободното време.
Координаторот на мрежата на хортикултурни библиотеки на Македонија м-р Јелена Петровска,библиотекар советник, одржа предавање и работилница за најновите практики во библиотечното работење и им пренесе на присутните идеи за организирање на настани и активности кои го следат „ритамот“ на заедницата.
Беа посочени низа примери од праксата на повеќе видови на библиотеки и различни типови на корисници. Таа посебно го потенцира како пример за добри практики проектот на НУ УБ „Св. Климент Охридски“ – Битола, Дневна соба на градот, која што просторно и технички, како мултифункционален библиотечен простор, дава пример како се работи во заедницата по принципот „библиотека е за сите“.
Предавањето понуди повеќе апликативни решенија во однос на библиотечните простори, финансирање на проекти, соработка со локалната средина, зголемување на компетенциите, професионализмот и мотивација на библиотекарите, а даде и нови идеи за реализација на програми со хортикултурна содржина. Присутните имаа прилика низ работилницата и меѓусебни дискусии и размената на мислењата да добијат нови сознанија за развојот на библиотечните програми во своите средини, кои зависно од својата разновидност имаат и специфични решенија.
Особен придонес од страна на локалната средина и бизнис секторот даде предавачот Лидија Иванова, дип. шумарски инженер во Паркови и зеленило при ЈП „Охридски Комуналец“ која со својата презентација „Охрид град на цвеќето“ даде практичен пример за соработка и предлози за досегашната и понатамошна соработка со библиотеката.
Практичниот дел на овој проект е реализиран токму со ова претпријатие, со уредување на влезот, платото и споменикот на патронот Прличев кај библиотеката. Видливата промена предизвикаа позитивни реакции кај граѓаните, а уште повеќе кај корисниците на библиотечните фондови.
Средбата заврши со заедничко дружење пред библиотеката во пријатна атмосфера и размена на нови идеи за соработка, но и со цветен поздрав до следното видување.
НУ Библиотека
