9 април, 2024
Вчера во НУ Библиотека “Григор Прличев“ директорот на установата Милчо Јованоски заедно со Сашо Точков, претседател на Црвен крст – Охрид во присуство на министерката за култура Бисера Костадиновска – Стојчевска го промовираа и го означија почетокот на Проектот „Книгата поблиску до старите лица“ финансиски поддржан од Министерството за култура , како дел од Годишната програма на библиотеката.
Се’ започна пред две години кога во рамките на одбележувањето на Неделата на грижа за стари лица во посета на Библиотеката „Григор Прличев“ од Охрид беа членови на „Најди време“.
Директорот Јованоски и Горка Донеска, координаторката на проектот, тогаш договорија три месеци лицата кои од разни причини не можат да дојдат да земаат книга во Библиотеката а сакаат да читаат да бидат бесплатно зачленети а книгите од Библиотеката до нивниот дом и назад ќе им ги дистрибуираат волонтери од Црвен крст – Охрид.
Тој пилот – проект се покажа успешен, но поради недостаток на финансиска поткрепа полека згасна и се реализираше инцидентно. Но, соработката со луѓето вклучени во програмата „Најди време“ успешно се продлабочи со нивно континуирано присуство во Библиотеката и активно учество во настаниите.
Наскоро ќе започне обука на волонтерите и лицата од оперативното тело „Најди време“ која ќе ја спроведат библиотекарите. Библиотеката и Црвен крст – Охрид планираат да подготват и подолгорочен проект кој ќе биде претставен пред меѓународни и домашни донатори.
Претходно активистите ја разгледаа библиотеката, имаа можност да одберат книги кои сакаат да ги читаат а од вчера со десеттина нови изданија кои ги добија како подарок ќе биде збогатена библиотеката во Црвен крст.
-Овој проект е вистински пример како ги чуваме и ги споделуваме културните вредности и културата ја правиме достапна за секого. Библиотеките се трезор на нашето колективно учење и знаење, а охридската библиотека која оваа година е поддржана со над 1 милион денари само за програма, низ годините го потврдува исклучителното значење за културниот развој на градот.
Продолжуваме да ги поддржуваме сите категории граѓани во своето усовршување и повисок квалитет на живот, рече во неврзаниот разговор со присутните министерката за култура Бисер Костадиновска – Стојчевска.
Во таа пригода директорот Јованоски и’ врачи статуетка на министерката за култура Костадиновска – Стојчевска за Министерството за култура а во знак на благодарност за лани поддржаниот проект Светски патувачки поетски фестивал „Прличев и Еминеску – поглед кон иднината“. Во организација на НУ Библиотека „Григор Прличев“ три дена во Охрид гостуваа поети од Романија, Унгарија, Словачка, Босна и Херцеговина, Бугарија, Косово и Северна Македонија.
Точно пред една година на завршниот настан претседателот на академијата од Крајова, академик Јон Деаконеску го одликува академик Миле Д. Миќуновиќ од Охрид со титулата Почесен член на Академијата во Крајова а министерката за култура на Северна Македонија, Бисера Костадновска – Стојчевска и Милчо Јованоски, првиот човек на охридската библиотека како најзаслужни за оваа светска поетска средба беа одликувани со медали „Михаи Еминеску“ од страна на Извршниот комитет на Меѓународната академија а беа прогласени и за Амбасадори на културата од страна на истоимената Европска фондација и Меѓународна академија „Михаи Еминеску“ од Крајова – Романија.
НУ Библиотека
