25 март, 2021 г.
Пред 161 година, на денешен ден во 1860 година на традиционалниот конкурс за поема, што се одржа во Атина, преродбеникот и писател Григор Прличев од Охрид доби „Ловоров венец“ за поемата “Сердарот”.
Во чест на патронот на нашата НУ Библиотека пред две години во рамките на Прличевите беседи беше прикажан видео проектот „Од животот на Прличев“ од авторот: м-р Милчо Јованоски. Тој е збир од фотографии, видеа и текстови, дел позајмени од ТВ филмови на МТВ кои во 30 минутен колаж го отсликуваат животот на големиот Прличев. Централно место има токму настанот од пред век и половина во Атина. Од денеска филмот е достапен и на Јутјуб каналот на нашата библиотека и може да го погледне секој заинтересиран за големиот Прличев. И на овој начин покрај конкурсот за поетски творби инспириран од Прличев преку документарецот, годинава потсетуваме на овој важен датум од нашата културна историја.
Григор Ставрев Прличев (Охрид, 18 јануари 1830 – Охрид, 6 февруари 1893) е истакнат македонски писател од времето на романтизмот и значаен претставник на македонската книжевност од 19 век. Овој генијален книжевник според јазичната припадност е тродомен автор: грчки, бугарски и македонски, и ги обединува во себе нивните специфични карактеристики и епохата во која живее и работи, класицизмот и романтизмот, како стилски белези. Според македонската енциклопедија, тој е писател кому Македонија му е и љубов и судба и болка и очај и неопходност и тага и лулка и гроб.
Со поемата „Сердарот“ („О Арматолос“) во Атина тој го освоил првото место, ловоровиот венец, паричната награда и бил прогласен за втор Хомер (1860). Во наградата спаѓало и студирање во Берлин или Оксфорд, но таа награда можел да ја добие само ако се откаже од се словенско во него – и тој ја одбил.
НУ Библиотека
