Постхумно во Струга промовирани две книги од писателот Петко Шипинкаровски
5 октомври, 2020 г.
Вчера во Домот на културата „Браќа Миладиновци“ во Струга во организација на Културниот центар „Бран“ – Струга и Меѓународната ревија за литература „Бранувања“ се одржа Послание во чест на писателот Петко Шипинкаровски (1946-2020).
На Посланието беа промовирани двете постхумно објавени книги: поемата „Обденица“ и збирката раскази „Вечен живот“. Поемата „Обденица“ беше промовирана од професор Димитар Пандев, а за збирката раскази „Вечен живот“ , говореа професорките Даниела Андоновска – Трајковска и Весна Мундишевска – Велјановска.
Промоторите рекоа дека Петко Шипинкаровски беше многу посветен на македонската литература. – Беше многу енергичен човек, со обемно литературно творештво кој даде голем влог во ревијата „Бранувања“ и меѓународната манифестација „Струшки книжевни средби. Позади себе остави отпечатени преку 30 книги. Шипинкаровски со својата литературна дејност носеше живост и свежина во културниот живот и изгради книжевни врски со многу негови соработници од повеќе земји. Без сомнение, неговото заминување е празнина во македонскиот литературен простор, зачувувач на македонските архаизми градејќи вредни сочиненија за македонската современа литература. Во меѓувреме, настапија и познати македонски автори, кои читаа песни посветени на Петко Шипинкаровски, рече организаторот Димче Шипинкаровски од Културниот центар „Бран“ – Струга.
Ораганизаторот на чествувањето на поединци и институции им врачи Златни благодарници во спомен на соработката со покојниот Петко Шипинкароски. Меѓу добитнците е и нашата НУ Библиотека „Григор Прличев“ од Охрид.
Петоко Шипинкароски, втор од лево во Прличевата одаја во Охрид , 8 јули 2019 г.
Во холот на Домот на културата беше отворена и изложбата на портрети и фотографии од животот на Петко Шипинкаровски, како и насловните страници на ревијата „Бранувања“.