23 април, 2021 г.
Синоќа преку интернет платформата Зум во пресрет на 23 Април – Светскиот ден на книгата и авторското право НУ Библиотека „Григор Прличев“ од Охрид и Здружението за промоција на култура, спорт и образование „Младински културно образовен центар Соната “ – Охрид преку првата онлајн средба го започнаа проектот „За вкусовите се дискутира“.
Преку овој своевиден Клуб на читатели кој ќе функционира и во време на пандемија, идејата е да се популаризираат книги, автори и читањето меѓу младите, но и меѓу сите вљубеници во литературата,стои во Меморандумот потпишан од вд. директорката на Библиотеката Гордана Змејковска и претседателот на Здружението „Соната“ Даниел Наумовски.
Во своето обраќање по повод почетокот на заедничката активност директорката Змејковска, рече:
-Почитувани, вљубеници во литературата , драго мие што сум дел од овој настан кој се надевам ќе постане традиција со која ќе се гордееме и ние од Библиотеката и нашите пријатели и соработници од Здружението СОНАТА од Охрид.
Потпишаниот Меморандум за соработка е само една рамка која ќе се надополнува и ќе биде поттик за нови идеи и форми на соработка на нашата установа и со други асоцијации и здруженија , како што било впрочем и досега.
Честит нека ни е утрешниот Светски ден на книгата и авторското право.
Ако светот ги има еден Шекспир и Мигел де Сервантес кои и ние ги славиме, за нас за македонската литература и јазик најмаркантна фигура е Блаже Конески.Токму оваа 2021 е негова година прогласена од Владата и Министерството за култура,
Оваа вечерашна дебата е само почеток на нашите активности во знакот на Конески.
Посакувам успешна работа на Проектот „За вкусовите се дискутира“., рече Змејковска.
Со доза на возбуда и желба за соработка и заедничко откривање нови светови преку книгите беше и обраќањето на првиот човек на „Соната“ Даниел Наумовски. Тој нагласи дека во Проектот кој од самиот старт е препознаен од вистинските читатели и вљубеници во литературата желба да се вклучат активно во неговата реализација изразиле и од Младинскиот образовен форум МОФ од Скопје. Тоа на проектот му дава уште една димензија на распространетост и можност да се слушнат квалитетни дебати, додаде Наумовски.
Во чест на големиот Конески беа презентирани био – библиографски податоци сврзани со неговиот живот и дело а учесниците на настанот читаа и негови стихови.
Посебен интерес побуди интервјуто со проф. д-р Вера Стојчевска – Антиќ која за својот некогашен професор и колега последниве години има напишано три книги и една заедничка „Тиквешкиот зборник“ . Еве како таа го доживеала Конески.
Со клик на линкот слушнете го интервјуто кое со д-р Антиќ го реализира Милчо Јованоски:
Инаку, Проектот „За вкусовите се дискутира“ ќе се спроведува во текот на една година. Замислата е еднаш месечно да има онлајн средба на која ќе се разговара на теми од литературата.
Координатор на проектот од „Соната“ е Сара Коваческа а од НУ Библиотека м-р Милчо Јованоски. Тие двајца заеднички ќе ја осмислуваат програмата за секој месец одделно. Во Проектот ќе бидат вклучени и други членови на здружението и библиотекари од НУ Библиотека – Охрид.
НУ Библиотека
