12 јуни, 2025 г.
Утре, петок во 12 часот во Прличевата одаја на НУ Библиотека „Григор Прличев“ во Охрид ќе биде промовирана збирката раскази „Ткаенина на животот“ од проф. д-р Симона Мартиноска.
-Кога започнав да пишувам, не знаев што ќе напишам, како тоа ќе изгледа, ниту дали воопшто ќе има некоја завршна форма или содржина. Само знаев дека сакам нешто да ставам на хартија што одамна го носам во себе. И така започнав, без намера или замисла за некакво споделување или објавување. А, најмалку со умисла дека сум некаков писател, ниту тогаш, ниту сега… Потоа се охрабрив да им дадам нешто да прочитаат моите најблиски. Не можев да се изначудам кога побараа да прочитаат уште. Тоа ме поттикна нешто да излезе и надвор од мојот дом. Па така, изненадувањето беше уште поголемо кога и овде сретнав заинтересираност за „уште“.
Напишаното е ткаенина создавана, меѓу сенките на вчера и денес, на што се надоврзуваат испреплетени светови, реални и надреални, а сето тоа го оформува мојот став кон денешната моја стварност, вели во предговорот на книгата – авторката д-р Мартиноска.
Меѓу кориците на „Ткаенина на животот“ сместени се дури 52 раскази поделени во два дела. Преку исклучително вештата нарација, Бојаџиева – Мартиноска го внесува читателот во „нејзините чевли“, за сосема несвесно да патува заедно со неа, низ нејзините топли приказни и да се врати во едно друго поубаво време. Вториот дел од книгата носи раскази кои таа ги „собрала“ на патот од пубертетот до зрелите години. Тоа се навидум едноставни теми од секојдневието а толку длабоки и филозофски. Слушнати, раскажани, прераскажани или доживеани искуства.
Промотори ќе бидат проф. д-р Јованка Денкова и м-р Милчо Јованоски
Расказите ќе ги читаат: м-р Климент Арнаудов и Марина Мартиноска а промоцијата ќе биде збогатена со настапот на виолинистката Александра Бухолц -Мартиноска, родена во Варшава, Полска, која своето образование го надградила на престижни музички академии во Виена. Таа е добитничка на повеќе од дваесет награди на меѓународни натпревари, а од 2014 година настапува како прва виолина тути, на државниот оркестар Тонкунстлер во Виена, каде и што живее.
Д-р Симона Мартиновска е редовен професор на Факултетот за туризам и угостителство во Охрид.
НУ Библиотека
