21 мај, 2025 г.
Во Требиње, Република Српска кон крајот на април, се одржа 25-тата меѓународна конференција за библиотекари под наслов: ,,Библиотеките и културното наследство” на која учествуваа околу 200 библиотекари, истражувачи и културни дејци од регионот и пошироко.
На овој значаен меѓународен настан, Република Северна Македонија беше претставена единствено од докторанд Елена Станкоска, виш библиотекар при Н.У. Библиотека ,,Григор Прличев” од Охрид, која имаше свое излагање на тема: ,,Културното наследство низ призмата на библиотеките”.
Излагањето беше посветено на македонското културно-историско наследство, со посебен акцент на градот Охрид. Присуството на македонски претставник на ваква конференција има повеќекратно значење – не само што се афирмира богатството на македонската култура пред меѓународната публика, туку се создаваат и нови мостови на соработка со сродни институции од регионот и светот.
Колешката Елена Станкоска , минатата недела во Велес учествуваше и на меѓународна конференција на библиотекари на тема „Услуги за корисници со посебни потреби и лица со попреченост“. Нејзиниот труд беше насловен: ,,Вештачка интелигенција за еднакви можности: Придобивки за лица со попреченост во библиотеките”.
Настанот беше збогатен со присуство на министерот за култура и туризам на Македонија, Зоран Љутков како и со излагачи од Индија, Македонија, Србија, Република Српска, Хрватска, Албанија и Косово.
НУ Библиотека
