3 мај, 2025 г.
По повод Денот на македонскиот јазик во понеделник на 5 мај од 12 часот НУ Библиотека „Григор Прличев“ од Охрид организира пригодна свеченост.
Премиерно ќе биде прикажан документарниот филм „80 години македонска современа азбука – кирилица“. Автори се ученици од ООУ „Братство – Единство“ под менторство на наставничките по македонски јазик: Љубинка Михајловска, Маја Гугоска – Дулеска и Сара Серафимоска.
Ученичката Ана Томовска од истото училиште ќе чита извадоци инспирирани од вековната борба за македонскиот јазик и македонската самостојност од Кочо Рацин и Крсте Петков – Мисирков а на виолина песната „Охрид, Охрид, убав, мил“ ќе ја изведе ученичката Бисера Радеска од одделението на наставничката Елизабета Здравеска.
На настанот ќе настапат и група ученици од ООУ „Ванчо Николески“ од Лескоец и Косел со инструментална изведба на блок флејти на познатата македонска песна „Битола мој роден крај“ во придружба на виолина на наставникот по музичко образование Тони Ѓоргиески.
Пригодно обраќање ќе има и в.д. директорката на Библиотеката Христина Трпеска, a библиотекарот Милчо Јованоски ќе го претстави Реткиот македонски фонд ( 1944- 1950 ) кој љубоморно се чува во депото на Библиотеката.
Посебна покана до сите наставници и професори по македонски јазик и литература од Охрид , за заедно да го одбележиме денoт.
Да се потсетиме: Точно пред 80 години на 5 мај 1945 година, со Решение на Народната влада на Федерална Македонија била усвоена азбуката на македонскиот јазик, а на 7 јуни,истата година Министерството за просвета го озакони првиот правопис на македонскиот јазик.
Потоа следуваат и основоположничките дела на великанот на македонскиот јазик и наука за јазикот, Блаже Конески: Граматика на македонскиот јазик, Речник на македонскиот јазик и Историја на македонскиот јазик, со што се заокружува кодификацијата на македонскиот јазик.
Создавајќи ја македонската држава, АСНОМ особено го истакна и постоењето на македонскиот јазик како клучен елемент на постоењето на македонската нација.
Развојот на денешната македонска азбука датира уште со појавата на глаголицата и потоа со замената на глаголицата со кирилица и со постепено развивање и усовршување на гласовно-графичкиот систем.
Владата на Република Северна Македонија во 2019 година донесе одлука 5. мај да биде прогласен за Ден на македонскиот јазик, во чест токму на ова решение.
НУ Библиотека
