23 декември, 2024 г.
На само десеттина дена до мигот кога ќе се поздравиме со оваа стара и истрошена 2024 година неа и ќе ја дочекаме Новата 2025 година денеска нашата Прличева одаја како и секогаш беше отворена за сите генрации.
Утрото уживавме во заедничкото китење на елките во Библиотеката и правењето новогодишни честитки со учениците од петто одделение од ОУ Григор Прличев“ и нивната одделенска наставничка Јагода Николоска.
Традиционално оваа несекојдневна активност ја спроведовме во соработка со Почесниот конзулат на Руската федерација во Охрид и почитуваната Елена Обухова.
Со нас беа и ученици и професори од Основното музичко училиште „Методи Патче“ предводени од директорот Наум Џуклески кои со изведба на класична музика ни ја збогатија средбата.
Заедно со децата, музичарите, наставниците и библиотекарите се дружеа и дел од активистите од Проектот „Најди време“ – Грижа за стари лица при Црвен крст – Охрид.
Поводот е познат. На почетокот на април, годинава во НУ Библиотека “Григор Прличев“ тогашниот директор на установата Милчо Јованоски заедно со Сашо Точков, претседател на Црвен крст – Охрид го промовираа и го означија почетокот на Проектот „Книгата поблиску до старите лица“ финансиски поддржан од Министерството за култура , како дел од Годишната програма на библиотеката, за оваа 2024 година која е на истек.
-Но, се’ започна пред две години кога во рамките на одбележувањето на Неделата на грижа за стари лица кога во посета на Библиотеката „Григор Прличев“ од Охрид беа членови на Проектот „Најди време“.
Уште тогаш екс директорот Јованоски и Горка Донеска, координаторката на проектот, договорија три месеци лицата кои од разни причини не можат да дојдат да земаат книга во Библиотеката а сакаат да читаат да бидат бесплатно зачленети а книгите од Библиотеката до нивниот дом и назад ќе им ги дистрибуираат волонтери од Црвен крст – Охрид.
Тој пилот – проект се покажа успешен, но поради недостаток на финансиска поткрепа полека згасна и се реализираше инцидентно.
Но, соработката со луѓето вклучени во програмата „Најди време“ успешно се продлабочи со нивно континуирано и активно присуство на нашите настани, рече во пригодниот збор в.д. директорката на НУ Библиотека „Григор Прличев“ Христина Трпеска.
Промовираниот проект во април од овој октомври заедно го продолживме и ќе се реализира до мај идната 2025. Носител на Проектот е Милчо Јованоски а соработник Елена Станкоска. Координатор од страната на Проектот „Најди време“ е писателката Марија Младеноска.
Ние како Библиотека, конкуриравме одново во Министерството за култура и туризам за негово продолжување до крајот на следната година.
А веќе ни е добро познато дека Библиотеката и Црвен крст – Охрид планираат да подготват и подолгорочен проект кој ќе биде претставен пред меѓународни и домашни донатори.
Овој проект е вистински пример како ги чуваме и ги споделуваме културните вредности и културата ја правиме достапна за секого.
Библиотеките се трезор на нашето колективно учење и знаење, а охридската библиотека која оваа година е поддржана со над 1 милион денари само за програма, низ годините го потврдува исклучителното значење за културниот развој на градот.
НУ Библиотека
