18 септември, 2023 г.
Деновиве во тридневна посета на НУ Библиотека „Григор Прличев“ од Охрид беше делегација од ЈУ Библиотека „Бора Станковиќ“ од Врање, Република Србија предводена од директорот Зоран Најдиќ. Претходно во јуни охридската Библиотека гостуваше во Врање и во таа пригода беше потпишан Протокол за долгорочна соработка меѓу двете установи.
Гостите од Врање се претставија со интересна тема: Обработка, презентација и негување на културниот идентитет на нивниот град. Договорени се активности и веќе се разменуваат идеи меѓу библиотекарите од двете Библиотеки за нивна реализација, контактите паралелно се одвиваат на неколку нивоа и ефектите се надеваме за скоро ќе бидат видливи, вели Милчо Јованоски, директор на Библиотеката „Григор Прличев“.
Во план е размена на програми кои се однесуваат на современата книжевна сцена и заедничко конкурирање пред ЕУ фондовите за култура.
Како институција сме заинтересирани за она што тие го имаат како напредок, дигитализацијата на книжниот фонд. Проект кој ние го подготвивме, токму со нивна помош и се надеваме дека нашето ресорно Министерство догодина ќе го финансира. Ние ќе им помогнеме во она во кое сме малку понапред, а тоа е процесот на заштита на старите и ретки книги, проект кој исто така го финансира нашето Министерството за култура. Подготвуваме мало, но современо депо за стари и ретки книги, тој проект е пред крај и ќе го промовираме следниот месец – октомври кој традиционално со децении се одбележува како „Месец на книгата“, вели Јованоски.
Претходно при посетата на Врање, охридската Библиотека донираше книги од македонски автори за тамошното македонското друштво, а одреден контингент од педесетина книги беше подарен и во Библиотеката во Врање со што е збогатено нивното македонско книжевно катче.
Кај нас реализиравме неколку кампањи, кога станува збор за дигитализацијата. Тоа е еден обемен и сериозен процес од кој произлегуваат голем број обврски, кои ние како културна установа која претендира да биде еден од лидерите на културната политика во јужниот дел на Србија се обидуваме да ја споиме традицијата со современите технологии, додава Јованоски.
„Да бидеме први, кои книжниот фонд ќе го обработат и афирмираат“, кажа Зоран Најдиќ, директор на ЈУ Библиотеката „Бора Станковиќ” од Врање.
Делегацијата од Врање беше во посета на Почесниот конзулат на Република Србија во Охрид каде беше примена од почесниот конзул Михајло Филев.
Среќен сум и горд што сум им домаќин на гостите од соседна Србија, предводени од Зоран Најдиќ, директор на ЈУ Библиотека „Бора Станковиќ” од Врање и нашиот добар домаќин, м-р Милчо Јованоски – НУ Библиотека „Григор Прличев“ кои заедно реализираат еден прекрасен проект започнат во Врање, пред три месеци. Проект кој ќе придонесе за една културна соработка меѓу двете библиотеки. А ќе се отвори со тоа уште едно поглавје за повеќе библотеки да се вмрежат во реализацијата на други проекти, рече Филев на средбата.
Тој подробно ги информира гостите за активностите и секојдневните преземања на Почесниот конзулат и неговата лична вклученост и посветеност во интензивирање на врските меѓу македонските и српски граѓани, институци, здруженија и поединци.
Гостите од Врање се запознаа со културно – историското наследство на Охрид беа во посета на Куќата на Робевци, работилниците за стара хартија и изработка на бисери од семејството Филеви.
НУ Библиотека
