2 мај, 2025 г.
Во организација на Лајонс клубот „Деница“ и НУ Библиотека „Григор Прличев“ денеска беа промовирани книгите „Филозофска Револуција I и II “ од Стефан Шорко од Охрид.
Д-р Јулија Василевска– психијатар и претседателка на женскиот лајонс клуб „Деница“ пренесе низа податоци сврзани со младиот Стефан и неговото образование и секојдневие. Таа, истовремено се наврати и на улогата на родителите во неговото воспитание, посебно на д-р Миле Шорко, таткото на Стефан, кој за жал е покоен и всушност бил главниот поддржувач на Стефан да навлезе во светот на науката, посебно географијата, историјата… Д-р Василевска од свој агол проговори за посветеноста на Стефан кон филозофијата и страста со која се создадени обете книги.
Библиотекарот Милчо Јованоски се задржа на дефиницијата за луѓето што создаваат свои мисли или некои што собираат туѓи мисли. Теоријата на книжевноста зависно од контекстот и нивната улога ги дели на: филозофи, афористичари, мислители, собирачи на цитати, писател на сентенци. Стефан е од сите по малку, заклучи м-р Јованоски.
Авторот на книгите Стефан Шорко во своето обраќање рече:
Од почетокот на мојата 22 година, јас и татко ми заедно се занимававме со филозофија. Оттогаш, почнавме да составуваме оригинални цитати кои ги чувавме на хартија. Сега, во негова чест, јавно ги објавувам во книги за да бидат прикажани кон луѓето од научни и меморабилни причини.
Дизајнот на првата книга вклучува слика од мојот татко со докторски мантил, со стетоскоп и со војнички шлем на кој е гравиран симболот на медицината (бидејќи беше воен доктор) и имаше многу силна карактерна (како и професионална) дисциплина.
Кружните алки околу него се симболи за полињата во кои беше доста навлезен: филозофија, медицина, географија, историја, религија и фармакологија.
Новото издание содржи 321 цитат (скоро три пати повеќе од првата книга, која има 123 цитати) и е продолжение на првата книга. Двете книги содржат 444 цитати.
Повеќето цитати, вклучувајќи ја и првата книга, се стекнати и измислени од лични искуства и практично анализирани пред да се состават, но има некои кои се инспирирани и преформулирани од веќе постоечки цитати.
Оваа книга цели да биде универзална, односно содржи цитати од секое поле на животот за да можат читателите од секој ранг да се пронајдат во неа.
Филозофска револуција 2 се состои од некои помеки, но некои поостри вистини кои можат да се совпаднат во секојдневната животна практика, како и скромно изречени совети за животот.
Како и за првата книга, полињата кои се поставени на горниот дел од предната корица се полиња кои лично јас сум ги студирал, а славните личности кои се ставени во задната корица ми беа инспирација за да ги составам новите цитати, рече Шорко.
Промоцијата беше интерактивна во неа се вклучија и присутните на кои им беа поделени мудир мисли , по случаен избор. Ги читаа и анализираа и на еден едноставен начин се едуцираа и забавуваа.
Шорко на сите присутни им врачи книги од двете изданија а д-р Василевска кажа дека во знак на поддршка на авторот Лајонс клубот „Деница“ ќе откупи одреден број примероци од авторот и подоцна пак ќе бидат поделени во хуманитарни цели.
НУ Библиотека
