24 ноември, 2024 г.
Во рамки на Меѓународниот фестивал „Јаков од Камена Река“, во петокот во Домот на културата во Македонска Каменица на в.д директорката на нашата НУ Библиотека „Григор Прличев“ Христина Трпеска и беше врачено признанието за Библиотека со најмногу издадени книги од домашни автори за 2024 година.
Директорката Трпеска забалагодарувајќи се за признанието пред присутните рече дека Охрид бил, е и ќе биде културен и просветителски центар и дека библиотеката и градот љубоморно ја чуваат и надградуваат традицијата и историјата сврзана со светите Климент и Наум Охридски со поетот и преродбеник, лавроносецот Прличев и плејадата роднокрајни автори.
Вечерта беа промовирани делови од македонскиот превод на „Часослов“ од Јаков од Камена Река, кој се смета за прв македонски печатар.
Беа изложени четириесетина панели со репродукции од оригиналниот текст и компјутерска адаптација на преведениот текст од делото кое било испечатено во 1566 година во Венеција.
Претставниците на нашата библиотека се сретнаа и со Миле Ѓорѓијоски, уметничкиот директор на фестивалот, познат македонски сатиричар и писател, со кого договоривме настан во Охрид.
Меѓународниот фестивал „Јаков од Камена Река“ годинава се одржа по втор пат, организатор беше здружението „Надеж“ со поддршка од културно-информативниот центар „Романса“ и Општина Македонска Каменица.
НУ Библиотека
