4 октомври, 2024 г.
Утре, 5 октомври – сабота од 11 часот во Прличевата одаја на НУ Библиотека „Григор Прличев“ во Охрид ќе биде промовирана третата стихозбирка од поетесата Елизабета Трајчевска – Ѓоршеска под наслов „Мали нешта до големи дела“
-Читањето на стиховите од Елизабета Трајчевска – Ѓоршеска повеќекратно го задоволува нашето љубопитство за ова ново име во современата македонска поезија.
Се добива впечаток дека во песните сѐ е познато, видено почувствувано, но сепак не може да се ослободиме од чувството на необичност, на посебност што обзема од самите песни. Поетесата со лирскиот сензибилитет ни создава еден времеплов низ нејзиното минато, сегашност и иднина.
Користејќи го наративот поезија во проза очигледен е напорот да се искаже себеси по сопствени патишта на пеењето.
Елизабета Трајчевска – Ѓоршеска е поетеса свртена кон животот кој е со многуслојно разнообразие од поетските интими до движењето, вели еден од рецензентите и промотор на стихозбирката Митре Мангоски Радождански.
Книгата „Мали нешта до големи дела“ е во издание на НУ Библиотека „Григор Прличев“ Охрид.
Елизабета Трајчевска – Ѓоршеска е родена во Битола. Потекнува од Демирхисарскиот крај. Живее и работи во село Велгошти, Охрид. Досега има издадено две стихозбирки: ,,За една пронајдена љубов“ во јули 2014 година и ,,Дрвото на животот“, септември 2016 година.
Учесник е на повеќе манифестации во Македонија а нејзини песни се застапени во неколку книги од повеќе автори.
НУ Библиотека
