Нова дигитализирана книга„Жура за Жура“ ( автор Владо Жура )

Нова дигитализирана книга„Жура за Жура“ ( автор Владо Жура )

Posted by Milco Jovanoski in Нови книги 12 Aug 2023

12 август, 2023 г. 

Деновиве, по речиси три децении се појави ново необично издание на книгата „Жура за Жура“. Се работи за аудио и видео издание на оваа мошне барана книга која се уште привлекува постојан интерес меѓу љубителите на книгата.

Книгата здогледа светло благодарение на ентузијастот Климент Симончев, сопственик на ГЕНРЕП компанијата за развој на софтвери и софтверски консултации. Потфатот на Симончев е инспириран од фрагмент од книгата за Илинден.

Нова дигитализирана книга „Жура за Жура“ на авторот Владо Жура. Синтетичкиот глас прозборе на Охридско наречје. Книгата е своевидна интимна историја на Охрид. Таа е дотолку позначајна сега, во тековниот момент, од причина што го става човекот директно во премрежјата на војните и промените, надвор од интерпретацијата. Авторот е концизен во изразот, како што е и јасен во своите фотографии за Охрид, кои ги постира на дневна база. Оваа книга – лична хроника, верувам дека ќе ги „очовечи“ информациите кои веќе ги имате. Благодарност на Владо Жура, за споделенета книга и можноста да се дигитализира на поинаков начин, напиша во оваа прилика Симончев.

За книгата во предговорот д-р Никола Бошале ќе напише дека книгата која авторот Жура ја подготвил за својот татко претставува своевиден мозаик кој се одликува не толку со бројот од настани и информации, колку со квалитетот на работите што се искажале и кристализирале во кратки приказни за луѓе и настани, за судбини и табиети охридски.

Со оваа книга имаме урнек биографските и автобиографските содржини да се искажат сосема јасно и концизно, па така дури и се кристализираат небаре се легенди и преданија, животни искуства и проверени мудрости, вели Бошале.

Инаку, книгата имаше промоција во рамките на Прличевите Беседи 1995 година, доживеа две изданија, достапна е во сите поголеми библиотеки, а присутна беше и за бесплатно спуштање од интернет повеќе од десет години.

Дотолку позначајно е што книгава се појавува во ваков аудиовизуелен формат заедно со досега дигитализираните изданија на македонски јазик на книги од авторите Оскар Вајлд, Роберт Луис Ственсон, нобеловецот Кнут Хамсун, потоа Артур Шницлер, Петер Хантке , Роберт Кувер и др.

НУ Библиотека