Во нашата Библиотека беше претставен творечкиот опус на Валерио Орлиќ, истакнат поет од Хрватска

26 мај, 2022 г. 
Како дел од големата турнеја по Македонија и Албанија, како и неговата земја, денеска во Охрид, беше претставен творечкиот опус на Валерио Орлиќ, истакнат поет од Хрватска.

Настанот беше во организација на НУ Библиотека „Григор Прличев“ од Охрид , при што беше промовирана и неговата најнова збирка поезија “Љубов распослана по морето”.

За поетското создавање на големиот пријател на Македонија, Валерио Орлиќ говореше познатиот новинар и публицист Веле  Митаноски.Тој рече:  – Некои се “Господари на прстените”, но нашиот себествојсвен Валерио е “Господар на своето време” (истоимена збирка од 2003-та година) на својот стих.

Тој може да живее и во државната метропола Загреб, но Ријека му “више паше”. Од Риека помалку се гледа, како политички подобните, воопшто и во литературата, незаслужено профитираат, не сака да биде дел од таа “непотистичка пајакова мрежа”. За уметноста се живее – од уметноста не се живее.

Поетите често пеат и сонуваат за слободата. Поетиоте не признаваат окови. На вистинските поети, поезијата им доага како дух на животот. Орлиќ, низ песните, е во потрага по својот душевен мир, неговата слобода е исконска и поетски вдахновена, рече Митаноски.

Директорот на нашата НУ Библиотека „Григор Прличев“,  Милчо  Јованоски на поетот Орлиќ му врачи  благодарница во знак на сеќавање на промоцијата во Охрид како и неколку  изданија од нашата издавачка програма.

Покрај во Охрид, Орлиќ ќе биде претставен и во Битола на 31 мај, а во меѓ увреме, ќе учествува на поетскиот фестивал “Поетски вечери” во Корча Албанија, од 28 мај.

НУ Библиотека