23.11.2021 г.
Најмладиот член во охридската Библиотека има 7, а највозрасниот 89 години. Од НУ Библиотека „Григор Прличев“ велат дека моментално бројат околу 1000 членови. Од почетокот на пандемијата, Библиотеката функционира со спроведување на протоколите за заштита од Ковид-19, а е забележан и зголемен интерес за читање од сите генерации, пишува Охрид њуз.
Независно од пандемијата, интересот за зајмување книги не се намалува, напротив бележиме зголемен интерес за читање и кај повозрасните, и она што посебно не радува кај помладата популација. Ова е резултат на континуираната набавка на нови изданија и обнова на старите барани лектирни изданија и белетристика која е основата на класичната литература. Библиотеката го збогатува својот фонд и преку донации од граѓаните, но и од авторите од Охрид и надвор од него, велат од НУ Библиотека „Григор Прличев“.
Сепак, и покрај постојаните набавки и збогатувањето на фондот со нови наслови, од НУ Библиотека „Григор Прличев“ од Охрид велат дека се соочуваат со проблемот на позајмени, а не вратени книги.
Од таа причина Библиотеката во јуни одлучи да ги повика сите корисници кои зајмиле книги до 2020 а не успеале да ги вратат, да го сторат тоа најдоцна до 31 декември, годинава. Целта е книгите повторно да го продолжат својот живот меѓу читателите, велат од НУ Библиотека „Григор Прличев“.
Според податоците од Библиотеката, се забележува и значителен интерес за домашните автори. Охриѓани најмногу ја одбирале литературата од Наде Стојилковиќ, Верица Митева , Маја Божиновска, Мирјана Проданова и Ивана Наскова, а од странските автори најчитани се Лусинда Рајли, Сара Џио, Колин Хувер, Себастијан Фицек, Тес Геритсен, Кристин Хана и ред други, додека најчитани жанровски се драмите, љубовните приказни и трилерите.
Имено, почетоците на библиотечната дејност во Охрид датираат уште од 19. век кога охридскиот терзија Ангел Групчев, за кого Прличев тогаш вели дека е „најчуениот маж“ во својот дуќан во охридската чаршија, отвора читалиште кое во тоа време привлекува големо внимание кај граѓаните. Оттогаш наваму се’ е веќе историја, велат од библиотеката. Градската библиотека во Охрид започнува со работа во 1946 година, а името „Григор Прличев“ го добива пред 70 години во 1951 година.
Извор: www.ohridnews.com
