24 ноември, 2024 г.
Вчера Националната и универзитетска библиотека „Свети Климент Охридски“ во Скопје свечено го одбележа јубилејот – 80 години од именувањето на првиот директор Ѓорѓи Шоптрајанов и започнувањето со работа на библиотеката во слободна Македонија со заповед на Поверенството за народна просвета на Президиумот на АСНОМ на 23 ноември 1944 година.
-Во историските мигови на раѓање на македонската државност, среде пепелта на војната, асномските визионери го положија темелот на народна библиотека – храм на словото и речта, симбол македонската ренесанса, рече во своето пригодно обраќање претседателката Гордана Сиљаноска – Давкова и доаде: – Осум децении од првите чекори на оваа институција, насловена како Народна библиотека, со првичен фонд од 150.000 книги, 50 читателски места и 12 вработени – вљубеници во книгата, се осум децении на учење, борба, непокорност и истрајност во мисијата – чувар на македонскиот идентитет, култура и колективна меморија. Од 1944 година, кога се круниса ослободувањето на татковината, па до денешната дигитална ера, библиотеката континуирано ги надминува границите на просторот и времето, посочи претседателката.
Како што рече претседателката Сиљаноска – Давкова НУБ „Свети Климент Охридски“ не е само духовна ризница, туку и амбасадор на македонската културна историја, чувар на македонскиот идентитет и симбол на вечноста.
Пред присутните се обратија и в.д. директорот Јовица Никчевски и државниот секретар во Министерството за култура и туризам, Марија Ѓоргова.
На одбележувањето на големиот јубилејот- 80 години од именувањето на првиот директор и започнувањето со работа на библиотеката во слободна Македонија присуствуваше и в.д. директорката на НУ Библиотека „Григор Прличев“ Христина Трпеска.
НУ Библиотека
