9 јули, 2021 г.
Утре од 21 часот во предворјето на Света Софија ќе биде одржана пригодна свеченост по повод големиот јубилеј 100 години од раѓањето на великанот од Небрегово, Блаже Конески.
Организатори на чествувањето се четирите Лајонс клубови од Охрид, Културолошка иницијатива ‘5 до 12’, Ротари клубот Охрид , а поводот е дванаесеттиот роденден на ЛК Лихнидос. Во организирањето на чествувањето на покана на клубот Лихнидос се приклучува и нашата Национална установа Библиотека „Григор Прличев“ – Охрид.
-Покрај редовните хуманитарни и еколошки активности, наша интенција е постојано да оддаваме почит кон најголемите домашни и светски имиња на културата и уметноста. А поголема и позначајна личност од Блаже Конески, во поновата Македонска историја, едноставно не постои. – изјави проф. д-р Зоран Тунтев, иницијатор на акцијата, за Охридњуз.
Библиотеката ќе се претстави со кусо интервју од Милчо Јованоски со проф. д-р Вера Стојческа – Антиќ во кое таа зборува за Конески како професор и колега, куса видео презентација посветена животот и творештвото на Конески и богатиоот фонд на дела кои библиотеката ги поседува од Конески а свој осврт како вовед во вечерта на неисцрпната тема – Конески ќе даде професорката Татјана Дурнева.
Настанот ќе биде збогатен со љубовна поезија, акустична музика, чаша вино и со гласовите на градскиот хор „Вокс Лихнидос“. Утревечер ќе биде прикажан и краток документарен филм “Поет на мал народ”, посветен на Славе Ѓорѓо Димоски а во режија на охриѓанецот Антонио Вељаноски, кој живее и работи во Прага.
НУ Библиотека
