27 септември 2018
Промовирана 98 книга на академик Миќуновиќ „Црногорски шеги“
Вчера во НУ Библиотека „Григор Прличев“ беше промовирана книгата „Црногорски шеги“ од академик д-р Миле Миќуновиќ, добро познат во нашиот и неговиов роден Охрид по својата секојдневна работа во „Свети Еразмо“, Специјалната болница за ортопедија и трауматологија.
Миќуновиќ во неговата докторска фела е познат по 400 научни и стручни трудови , 10 универзитетски книги над 50 колумни во дневен печати стотина популарни статии напишани на веб порталот доктори мк. Почитуван меѓу колегите и ценет и баран од пациентите.
Во областа на литературата тој е вистински воркохолик ЦРНОГОРСКИ ШЕГИ е неговата 98 книга.
Од март годинава тој стана акдемик, член е на Европската академија на науките и уметностите во Салцбург – Австрија.
Промотор на неговото најново дело беше м-р Милчо Јованоски.
-„Црногорски шеги“ содржи 466 шеги од и за Црногорците. Најголемиот дел од нив Миќуновиќ ги слушал од своите предци,другари и пријатели, други ги доживеал и самиот а дел од нив ги пренесува во изворна форма објавувани во разни списанија и часописи.
Мене кај академик Миќуновиќ ме импонира неговата целосна посветеност кон секоја тема за која со љубов ќе се зафати да ја обработи. Така е и со шегите, навидум едноставно ама доволно комплицирано, со стравот дека некој може да ви се налути што правите шега на негова сметка во случајот на неговиот род..
Ова е време во кое не сакаме да се навредуваме , туку време да се пошегуваме и насмееме или како што вели самиот академик Миќуновиќ УЖИВАЈТЕ И СМЕЈТЕ СЕ, рече промоторот Јованоски и додаде:
-Шегите, прочитав некаде се ментална хигиена на човекот. Прочистување на духот. Д-р Миќуновиќ тоа вешто го подредил во оваа збирка. Шегите за Црногорците се одамна познати не само овде меѓу нас на Балканот, туку и насекаде по светот кадешто живеат Црногорци. Работливоста во наводници, мрзеливоста, односот кон жената и воопшто кон животот се неисцрпна инспирација за вештите шегаџии кои од обичен разговор и анегдота ќе создадат шега која ќе се прераскажува со поколенија.
На Црногорците најчесто друштво им прават Србите а омилен град по многу нешта им е Белград. И денеска велат дека во Србија на власт – условно речено се Црногорците.
Неизостануваат шегите и споредбите со Босанците и со странците ама како лавина која носи со себе се’ пред себе се тркалаат и најновите шеги со современа тематика. Во дел од нив во корелација се машко – женските односи, благата еротика и посебно сексот како дисциплина. Чекајте, за среќа во публикава немаме малолетни.
Пред присутните се обрати и авторот на книгата академик Миле Миќуновиќ кој рече:
Книгата „Црногорски шеги“ е збир од шеги или вистини, кој знае за Црногорците кои нашироко се раскажуваат со децении. Но, дали е се’ така како што изгледа на прв поглед. Шегата и хуморот се една од најубавите работи на светот. Тоа е нешто што ни ја разгалува душата и ни предизвикува насмевка на лицето, ни го разубавува животот и ни овозможува сите тешкотии полесно да ги поднесуваме. Се плашам за секоја нација која нема виц за себе!, рече академик д-р Миле Миќуновиќ.
