4 февруари 2019
На 5 и 6 февруари ( вторник и среда ) во чест на големиот македонски поет и преродбеник Григор Прличев во Охрид ќе се одржат традиционалните „Прличеви беседи 2019“
НУ Библиотека „Григор Прличев“ во одбележувањето на 126 годишнината од смртта на ловороносецот Прличев во општинската програма учествува со неколку настани.
Во вторник на 5 февруари во 12 часот во просториите на Библиотеката по повод јубилејот 30 години од манифестацијата ќе биде промовирана монографијата „Поетска ноќ во Велестово“. Промотор ќе биде д-р Димитар Пандев а организатор на настанот е Општина Охрид.
Ден потоа – среда, 6 февруари во 12 и 45 на бистата на Прличев пред библиотеката ќе бидат положени свежо цвеќе и ловоров венец. Беседа за бессмртниот Прличев и неговата поема „Сердарот“ ќе одржи секретарот на Друштвото на писателите на Македонија Мишел Павловски.
Од 13 часот истиот ден во Прличевата одаја во библитоеката ќе се одржи Портрет посветен на роднокрајниот поетот и писател Видое Видически.
Тој минатата година стана добитник на највисокото општинско признание наградата за животно дело „Св. Климент Охридски – Патронот на Охрид “ .
За неговото творештво ќе беседат: Горјан Петревски и Славе Ѓорѓо Димоски.
По портретот ќе биде прикажан 30 минутниот видео проект „Од животот на Прличев“ чиј автор е м-р Милчо Јованоски, вработен во библиотеката.
Чествувањата во знакот на Прличев во охридската библиотека ќе бидат заокружени со традиционалната Охридска визита.
